” ريف رس ” 21 أبريل 2021
المغتربة نادية بشلوش عمران
بالما و بالغيس
في السما
كتبنا روايتنا
بالما على الما
على أمواج البحور
بالسمق و بالبخور
كتبنا حكايتنا
روايات شعب مقهور
في الظلام
في كل وراق منظوم مظلوم
شعب مقطوع من شجرة
راضع بحليب مسموم
كبر مسقوم ،
في جحيم محموم
حزين و مهموم
لسانوا مقوس مقسوم
الحلم مهدوم
و لا تزعزع مدموم
علاش؟؟؟!!
كيفاش؟!!!!
آش لي جرا؟؟!!!
قطعنا البحور
و باقي العالم تزيد لݣدام
تتقدم و تدور
و أحنا لور لور
شعبنا تنوض و يطيح
في نفس الدوامة
تدور ، في طاحونة الزيروا
تتطحن زيت و ما
غيس و سما
علاش؟!!!
كيفاش؟!!!
أحنا في أرضنا ،
ما تململنا
في لحظة حرثناها
و خلينها كحلة جدبة
فاجرة فاخرة قاهرة
غرسنا الأوتاد على ظهرنا
و جا الحصاد و قهرنا
فين تتلاقى السما مع الما
و تتخلط الغيس مع الما
وصلات غمامات روايتنا
روايات الغيس و الما
شتات في العراصي
في كل مكان
فهموا حكايتنا
حكايات شتا فيها مونولوݣ
من دقة الغيطة و الطبل
كلام العيطة و ترانيم الناي
روايات الدموع ،
قطرات الشموع
شتات على كل الربوع
رواياتنا بالطنز العكري
و عرفوا بأن روايتنا
روايات لشعب مقهور
باقي تآمن بحورية البحور
بلالا عيشة قنديشة و شمهروش
و حكايات ألف ليلة و ليلة
و روايات مول السلطان و شهر زاد
و بسلطان الزمان لي ما معاه أمان
بحكايات الصمت الدرك و النسيان
كيفاش؟؟؟!!
و علاش ؟؟؟!!!
هاذ الصمت مادواوش
و ما بخر بحور
و لا زلزل سور
ما شرݣ كلام
و لا كسر ظلام
و لا نطق بالسمق عل الفيسبوك
و لا هاج كسر روايات المجذوب
و صرخ يݣول باركة من هاذ الخراب
يا هذاك الغراب
علاش؟؟!!
كيفاش؟!!!
و أنتوما تتسمعوا
عداك بلاكوا
سكتوا طموا
و رضيتوا بالطنز العكري
و فتحتوا حوار
و لا كسرتوا الأسوار
و لا قريتوا الدوار
و لا شفتوا شوار
و لا كنتوا حصان
يطير و يركل
يوري حنة الزمان
علاش ؟؟!!
رضيتوا بالطنز
بشلا كلام
من روايات زمان
و اعشتوا في الخوف
سمعتوا روايات الأوهام
لسنين دازت و لأعوام
روايات مكتوبة بالدم
بمداد الظلم على
كل عين مكحلة بالعمى
و على كل فم مسوك بالدم
و على كل يد محنية بالظلم
و على كل أرض زينة موشومة بالسم
و على كل شعب و قبيلة راضيين بالهم
طاحت شتانا
خيط من السما
في كل مكان
نبتت روايتنا
حصدوا قصتنا
عرفوا آش بينا
و ݣالوا للعالم
هذيك حݣرتنا
وصلت سلعتنا
شافوا ظلمنا
قراوا دموع عيونا
و عرفوا آش تما
حكايتنا حكايات
الطين و الما
روايات الغيس لي واكلنا .
