” ريف رس ” 21 شتنبر 2023
مولاي الحسن بنسيدي علي
بكلام منظوم داويين
لوزيعة بيناتهم مفرقين
فين حق الشعب المسكين
ومن تحتها ومن معاه مخبين
ما هَمْهُمْ من ماتوا مردومين
ودموع المقهورين
شلال مدفق من عين
جا زلزال الحوز بَخْبَرْ حْزين
ف عام ألفين وثلاث وعشرين
يوم جمعة والناس ساجدين
مسيرة الخير هبت ف الحين
من لكويرة لتطوين
من زاد كثير ودوا وخيام حاملين
يد ف يد متحدين
لمليكنا لعزيز مبايعين
على خطى جدو سايرين
شعب وجيش مضامنين
ضمدوا جراح المعطوبين
مسحوا دموع المكلومين
وعلى الحدود ساهرين
سبوعا في المحنة واقفين
وكلاب الكورنة من بعيد نابحين
والكابرانات بجناوة مسنونين
على بلادنا حاقدين
العديان فينا شامتين
لتضحية لمغاربة متناسيين
والمغرب بلاد الوليا والصالحين
يتبدل الحال ويجي عام زين
نغرسو فيه فل وياسمين
عرب وعجم على مسيرتنا شاهدين
والصلا على النبي الأمين
وربي يرحم الشهدا كاملين
ويشفي المرضى والمعطوبين
وف محنتنا ما ننساو خوتنا الليبيين
والحوز ودرنة عليها لقلوب متحسرين
ونظم الكول ما تقضى يا سمعين
